ନବସେତୁ ନ୍ୟୁଜ | ବରଗଡ଼ବୁଧବାର, ୨ ଜୁଲାଇ, ୨୦୨୬
ବରଗଡ଼: ଝାରବନ୍ଧ ବ୍ଲକ ଦେବାନପାଲି ଅଙ୍ଗନୱାଡ଼ି କେନ୍ଦ୍ରରେ ଜଣେ ଦଳିତ ମହିଳା ପାଚିକାଙ୍କୁ ଜାତି ଆଧାରେ ନିର୍ଯାତନା ଦିଆଯାଉଥିବା ସାଂଘାତିକ ଅଭିଯୋଗ ହୋଇଛି। ଦୁଇ ମାସ ତଳେ ନିଯୁକ୍ତି ପାଇଥିବା ଉକ୍ତ ମହିଳାଙ୍କୁ ଚାକିରୁ ଇସ୍ତଫା ଦେବାକୁ ଗ୍ରାମର କିଛି ଲୋକ ଲଗାତାର ଚାପ ପକାଉଛନ୍ତି।
କ’ଣ ରହିଛି ଅଭିଯୋଗ?
୧. ଖାଦ୍ୟ ବର୍ଜନ ପାଇଁ ଉସକାଇବା: ପାଚିକା ପ୍ରସ୍ତୁତ କରୁଥିବା ଖାଦ୍ୟ, ଅଣ୍ଡା ଓ ଛତୁଆ ନ ଖାଇବା ପାଇଁ ଗ୍ରାମବାସୀମାନେ ଅଙ୍ଗନୱାଡ଼ି ପିଲାଙ୍କୁ ଉସକାଉଛନ୍ତି।
୨. କେନ୍ଦ୍ରକୁ ନ ପଠାଇବାକୁ ଚାପ: ପିଲାମାନଙ୍କୁ କେନ୍ଦ୍ରକୁ ନ ପଠାଇବା ପାଇଁ ଅଭିଭାବକମାନଙ୍କୁ ମଧ୍ୟ ପ୍ରବର୍ତାଯାଉଛି।
୩. କେନ୍ଦ୍ରରେ ତାଲା: ବୁଧବାର ଦିନ କିଛି ଗ୍ରାମବାସୀ ଅଙ୍ଗନୱାଡ଼ି କେନ୍ଦ୍ରରେ ତାଲା ପକାଇ ଦେଇଥିଲେ। ଫଳରେ ଗର୍ଭବତୀ, ପ୍ରସୂତୀ ଓ ଛୋଟ ପିଲାମାନେ ପୁଷ୍ଟିକର ଖାଦ୍ୟ ଓ ଜରୁରୀ ସେବାରୁ ବଞ୍ଚିତ ହୋଇଥିଲେ।
ପୀଡ଼ିତାଙ୍କ ବୟାନ
ପୀଡ଼ିତା କହିଛନ୍ତି, “ଗାଁରେ ବୈଠକ କରି ମୋତେ ପାଚିକା ଦାୟିତ୍ୱ ଦିଆଯାଇଥିଲା। କିନ୍ତୁ ମୁଁ ଦଳିତ ବୋଲି କିଛି ଲୋକ ମୋ ହାତରନ୍ଧା ଖାଇବେ ନାହିଁ ବୋଲି ପିଲାଙ୍କୁ କହୁଛନ୍ତି। ଚାକିରି ଛାଡ଼ିବାକୁ ମୋ ଉପରେ ବାରମ୍ବାର ଚାପ ପକାଯାଉଛି।” ତାଙ୍କ ବାପା ଅବଧୂତ ଜଗତ ମଧ୍ୟ ଝିଅକୁ ଚାକିରିରୁ ବାହାର କରିବା ପାଇଁ ନିର୍ଯାତନା ଦିଆଯାଉଥିବା ଅଭିଯୋଗ କରିଛନ୍ତି।
ପ୍ରଶାସନର ପଦକ୍ଷେପ
ଘଟଣା ସମ୍ପର୍କରେ ଅଙ୍ଗନୱାଡ଼ି କର୍ମୀଙ୍କ ପକ୍ଷରୁ ଲିଖିତ ଅଭିଯୋଗ ପାଇବା ପରେ ଝାରବନ୍ଧ ସିଡିପିଓ ତୁରନ୍ତ ପ୍ରତିକ୍ରିୟା ଦେଇଛନ୍ତି। ସେ କହିଛନ୍ତି, “ଅଭିଯୋଗ ମିଳିଛି। ଏହି ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରାଯିବ। ତଦନ୍ତ ରିପୋର୍ଟ ଆଧାରରେ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।”
ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ସମ୍ବିଧାନରେ ଅସ୍ପୃଶ୍ୟତା ନିଷିଦ୍ଧ ଥିବା ବେଳେ ଏଭଳି ଜାତିଗତ ଭେଦଭାବ ଘଟଣା ଗ୍ରାମାଞ୍ଚଳରେ ସାମାଜିକ ସଚେତନତାର ଅଭାବକୁ ପଦାରେ ପକାଇଛି।
ଧନ୍ୟବାଦ ନବସେତୁ ନ୍ଯୁଜ