ପ୍ରବଳ ବର୍ଷା ଓ ମାଟି ଘର: ଆଉ କେତେ ମୃତ୍ୟୁ ପରେ ଜାଗିବ ପ୍ରଶାସନ?

ସମ୍ପାଦକୀୟ ପ୍ରଶଙ୍ଗ ନବସେତୁ ନ୍ୟୁଜ, ବଲାଙ୍ଗୀର

ପ୍ରକୃତିର ରୌଦ୍ର ରୂପ ପୁଣି ଥରେ ମଣିଷ ଜୀବନ ନେଲା। ପ୍ରବଳ ବର୍ଷା ଯୋଗୁଁ ଘର କାନ୍ଥ ଭୁଶୁଡି ଜଣେ ନିରୀହ ବୃଦ୍ଧଙ୍କ ମୃତ୍ୟୁ ଏବଂ ଜଣେ ବୃଦ୍ଧାଙ୍କ ଗୁରୁତର ହେବା ଘଟଣା କେବଳ ଏକ ଦୁର୍ଘଟଣା ନୁହେଁ, ଏହା ଆମ ଗ୍ରାମୀଣ ବିକାଶ ଏବଂ ପ୍ରଶାସନିକ ଅବହେଳାର ଜଳଜଳ ପ୍ରମାଣ।

ଗତ ୦୫/୦୬/୨୦୨୬ ରାତିରେ ବଲାଙ୍ଗୀର ଜିଲ୍ଲା ପୁଇଁତଲା ବ୍ଲକ ପଥର୍ଲା ପଞ୍ଚାୟତ ଲୁହୁରେନପାଲି ଗାଁର ୬୫ ବର୍ଷୀୟ ଗଣ୍ଡାରାମ କୁମ୍ଭାର ଓ ତାଙ୍କ ପତ୍ନୀ ଲକ୍ଷ୍ମୀ କୁମ୍ଭାର ନିଜ ଝାଟିମାଟି ଘରେ ନିରାପଦରେ ଶୋଇଥିଲେ। କିନ୍ତୁ ମଝି ରାତିର ଲଗାଣ ବର୍ଷା ସେମାନଙ୍କ ସ୍ୱପ୍ନ ସହ ଘର କାନ୍ଥକୁ ମଧ୍ୟ ଭାଙ୍ଗି ଦେଲା। ମାଟି ତଳେ ଚାପି ହୋଇ ଗଣ୍ଡାରାମଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଲା। ଗୁରୁତର ଲକ୍ଷ୍ମୀଙ୍କ ଜୀବନ ଏବେ ବି ସଂକଟାପନ୍ନ।

ପ୍ରଶ୍ନ ଉଠୁଛି – ଦାୟୀ କିଏ?

1. ଦୁର୍ବଳ ଆବାସ ଯୋଜନା: ଆଜି ବି ଓଡିଶାର ବହୁ ଗରିବ ପରିବାର ଝାଟିମାଟି ଘରେ ରହୁଛନ୍ତି। ପ୍ରଧାନମନ୍ତ୍ରୀ ଆବାସ ଯୋଜନା କି ବିଜୁ ପକ୍କା ଘର ଯୋଜନା ଏହି ପରିବାର ପାଖରେ ପହଞ୍ଚି ପାରିଲା ନାହିଁ କାହିଁକି?
2. ପୂର୍ବ ସତର୍କତାର ଅଭାବ: ପ୍ରତିବର୍ଷ ବର୍ଷା ଋତୁ ଆସିବା ପୂର୍ବରୁ ପ୍ରଶାସନ ପକ୍ଷରୁ ମାଟି ଘର ଚିହ୍ନଟ କରି ସେମାନଙ୍କୁ ସ୍ଥାନାନ୍ତର କିମ୍ବା ଅସ୍ଥାୟୀ ଆଶ୍ରୟ ଦେବାର ବ୍ୟବସ୍ଥା କେଉଁଠି?
3. କ୍ଷତିପୂରଣ କେବେ?: ଦୁର୍ଘଟଣା ପରେ ନେତା ଆସନ୍ତି, ଫଟୋ ଉଠାନ୍ତି, ଦାବି କରନ୍ତି। କିନ୍ତୁ ମୃତକଙ୍କ ପରିବାରକୁ ତୁରନ୍ତ ଆର୍ଥିକ ସହାୟତା ଏବଂ ଆହତଙ୍କ ମାଗଣା ଚିକିତ୍ସାର ଗ୍ୟାରେଣ୍ଟି କେବେ ମିଳିବ?

ଆଜି ଘଟଣାସ୍ଥଳରେ ବରିଷ୍ଠ କଂଗ୍ରେସ ନେତା ନରେଶ ବାଗ, ବଜରଙ୍ଗୀ ଅମାତ, ଏମ୍.ବି.ଏମ୍.ଏମ୍ ସଭାପତି ସରୋଜ କୁମାର ମେଶ୍ଵା ଏବଂ ଗୋକୁଳ କୁଅଁର ପହଞ୍ଚି ଶୋକ ପ୍ରକାଶ କରିବା ସହ ସରକାରୀ ସହାୟତା ଦାବି କରିଛନ୍ତି। ସେମାନଙ୍କ ଦାବି ଯୁକ୍ତିଯୁକ୍ତ। କିନ୍ତୁ ଦାବି ନୁହେଁ, କାର୍ଯ୍ୟ ଦରକାର।

ଆମ ଦାବି
ଜିଲ୍ଲା ପ୍ରଶାସନ ତୁରନ୍ତ ମୃତକଙ୍କ ପରିବାରକୁ ସରକାରୀ ନିୟମ ଅନୁଯାୟୀ ସର୍ବାଧିକ କ୍ଷତିପୂରଣ ପ୍ରଦାନ କରୁ। ଆହତ ଲକ୍ଷ୍ମୀ କୁମ୍ଭାରଙ୍କ ସମ୍ପୂର୍ଣ୍ଣ ଚିକିତ୍ସା ଖର୍ଚ୍ଚ ସରକାର ବହନ କରୁ। ଏବଂ ସବୁଠୁ ଗୁରୁତ୍ୱପୂର୍ଣ୍ଣ କଥା – ଜିଲ୍ଲାର ସମସ୍ତ ମାଟି ଘରର ସର୍ଭେ କରି ଆଗାମୀ ୩ ମାସ ମଧ୍ୟରେ ସେମାନଙ୍କୁ ପକ୍କା ଘର ଦେବାର ରୋଡମ୍ୟାପ୍ ପ୍ରସ୍ତୁତ କରୁ।

ଗଣ୍ଡାରାମଙ୍କ ମୃତ୍ୟୁ ଯେମିତି ଶେଷ ମୃତ୍ୟୁ ହେଉ। ଆଉ କୌଣସି ମା’ ପ୍ରବଳ ବର୍ଷାରେ ନିଜ ଘର ତଳେ ଚାପି ହୋଇ ମରଣ ବରଣ ନ କରୁ। ନଚେତ୍ ଏହି ରକ୍ତ କେବଳ ପ୍ରକୃତିର ନୁହେଁ, ଆମ ସମସ୍ତଙ୍କ ବିବେକର ବି।

ରିପୋର୍ଟ: ନବସେତୁ ନ୍ୟୁଜ, ବଲାଙ୍ଗୀର