ନବସେତୁ ନ୍ୟୁଜ | ଭୁବନେଶ୍ୱରମଙ୍ଗଳବାର, ୦୨ଜୁଲାଇ, ୨୦୨୬
ଭୁବନେଶ୍ୱର: ଓଡ଼ିଶାରେ ଶି କ୍ଷା କ୍ଷେତ୍ରରେ ବଡ଼ ପରିବର୍ତନ ଆଣିବାକୁ ଯାଉଛନ୍ତି ରାଜ୍ୟ ସରକାର। କେଜିରୁ ପିଜି ପର୍ଯ୍ୟନ୍ତ ସମ୍ପୂର୍ଣ୍ଣ ମାଗଣା ଶିକ୍ଷା ପ୍ରଦାନ ପ୍ରସ୍ତାବକୁ ଆଜି ରାଜ୍ୟ କ୍ୟାବିନେଟ୍ ମଞ୍ଜୁରୀ ଦେଇଛି। ମୁଖ୍ୟମନ୍ତ୍ରୀ ମୋହନ ମାଝୀ ଏହି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ସମ୍ପର୍କରେ ସୂଚନା ଦେଇଛନ୍ତି। ଆଜି କ୍ୟାବିନେଟ୍ ବୈଠକରେ ମୋଟ ୧୨ଟି ପ୍ରସ୍ତାବକୁ ଅନୁମୋଦନ ମିଳିଛି।
କ’ଣ ରହିଛି ନିଷ୍ପତ୍ତିରେ?
୧. ନାମଲେଖା ଶୁଳ୍କ ଛାଡ: ବିଦ୍ୟାଳୟ ଓ ଗଣଶିକ୍ଷା ବିଭାଗ ପ୍ରସ୍ତାବ ଅନୁଯାୟୀ, କେଜି ଶ୍ରେଣୀରୁ ସ୍ନାତକୋତ୍ତର (ପିଜି) ପର୍ଯ୍ୟନ୍ତ କୌଣସି ଶିକ୍ଷାନୁଷ୍ଠାନରେ ନାମଲେଖା ପାଇଁ ଛାତ୍ରଛାତ୍ରୀଙ୍କୁ କୌଣସି ଦେୟ ଦେବାକୁ ପଡିବ ନାହିଁ।
୨. ଲକ୍ଷ୍ୟ: “ଆର୍ଥିକ ସମସ୍ୟା ପାଇଁ କେହି ଶିକ୍ଷାରୁ ବଞ୍ଚିତ ନ ହୁଅନ୍ତୁ, ଏହା ଆମ ସରକାରର ମୂଳ ଲକ୍ଷ୍ୟ,” ବୋଲି ମୁଖ୍ୟମନ୍ତ୍ରୀ କହିଛନ୍ତି।
୩. ମିଡ୍ ଡେ ମିଲ୍ ବିସ୍ତାର: ପୂର୍ବରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ମିଳୁଥିବା ମଧ୍ୟାହ୍ନ ଭୋଜନ ଏବେ ନବମ ଓ ଦଶମ ଶ୍ରେଣୀ ପିଲାଙ୍କୁ ମଧ୍ୟ ମିଳିବ। ଏହି ଯୋଜନା ଆସନ୍ତା ୫ ବର୍ଷ ପାଇଁ ଲାଗୁ ହେବ। ଏହାଦ୍ୱାରା ରାଜ୍ୟର ୫୭ ଲକ୍ଷରୁ ଅଧିକ ଛାତ୍ରଛାତ୍ରୀ ଉପକୃତ ହେବେ।
ମୁଖ୍ୟମନ୍ତ୍ରୀଙ୍କ ପ୍ରତିକ୍ରିୟା
“ଶିକ୍ଷା ପ୍ରତ୍ୟେକ ପିଲାଙ୍କ ମୌଳିକ ଅଧିକାର। ଆର୍ଥିକ ଅଭାବ କାରଣରୁ କୌଣସି ପିଲା ପାଠପଢାରୁ ବଞ୍ଚିତ ହେବା ଉଚିତ ନୁହେଁ। କେଜିରୁ ପିଜି ମାଗଣା ଶିକ୍ଷା ଓ ନବମ-ଦଶମରେ ମିଡ୍ ଡେ ମିଲ୍ ନିଷ୍ପତ୍ତି ଓଡ଼ିଶାର ଶିକ୍ଷା ବ୍ୟବସ୍ଥାରେ ଏକ ନୂଆ ଅଧ୍ୟାୟ ସୃଷ୍ଟି କରିବ,” ବୋଲି ମୁଖ୍ୟମନ୍ତ୍ରୀ ମୋହନ ମାଝୀ କହିଛନ୍ତି।
କ୍ୟାବିନେଟର ଅନ୍ୟ ନିଷ୍ପତ୍ତି
ଆଜିର କ୍ୟାବିନେଟ୍ ବୈଠକରେ ଶିକ୍ଷା ସମେତ ମୋଟ ୧୨ଟି ବିଭାଗର ପ୍ରସ୍ତାବକୁ ମଞ୍ଜୁରୀ ମିଳିଛି। ଏହି ନିଷ୍ପତ୍ତି ରାଜ୍ୟର ସାମାଜିକ ଓ ଆର୍ଥିକ ବିକାଶକୁ ତ୍ୱରାନ୍ୱିତ କରିବ ବୋଲି ଆଶା କରାଯାଉଛି।
_ଫଟୋ: କ୍ୟାବିନେଟ୍ ବୈଠକରେ ନିଷ୍ପତ୍ତି ନେଉଛନ୍ତି ମୁଖ୍ୟମନ୍ତ୍ରୀ | ନବସେତୁ ନ୍ଯୁଜ
ଧନ୍ୟବାଦ ନବସେତୁ ନ୍ଯୁଜ