ନବସେତୁ ନ୍ୟୁଜ | ସମ୍ପାଦକୀୟଶୁକ୍ରବାର, ୪ ଜୁଲାଇ, ୨୦୨୬
ବମ୍ବେ ହାଇକୋର୍ଟର ଗୋଟିଏ ପଦରେ ସମଗ୍ର ଦେଶର ବିବେକ ଜାଗି ଉଠିଛି। ଜଷ୍ଟିସ୍ ମାଧବ ଜାମଦାର ଯାହା କହିଲେ, ତାହା କେବଳ ଏକ ଆଇନଗତ ମନ୍ତବ୍ୟ ନୁହେଁ, ତାହା ହେଉଛି ସମ୍ବିଧାନର ଆତ୍ମାର ଉଚ୍ଚାରଣ।
ମାମଲାଟି କ’ଣ?
ସୋସିଆଲିଷ୍ଟ ଡେମୋକ୍ରାଟିକ୍ ପାର୍ଟି ଅଫ୍ ଇଣ୍ଡିଆର ମହାସଚିବ ସଇଦ୍ ଅହମଦ ଅବ୍ଦୁଲ ୱାହିଦ ଚୌଧୁରୀ CAA ଓ ଜ୍ଞାନବାପୀ ବିବାଦକୁ ବିରୋଧ କରି ଧର୍ଣ୍ଣା ଓ ଶୋଭାଯାତ୍ରା କରିଥିଲେ। ମୁମ୍ବାଇ ପୁଲିସ ପାଞ୍ଚଟି FIR ଦେଖାଇ ତାଙ୍କୁ ଏକ ବର୍ଷ ପାଇଁ ‘ଜିଲ୍ଲା ବଦର’ କରିଦେଲା। ଅପରାଧ? ସେ “BJP ମୁର୍ଦ୍ଦାବାଦ”, “ଅମିତ ଶାହା ମୁର୍ଦ୍ଦାବାଦ” ନାରା ଦେଇଥିଲେ।
ଜଜ୍ କହିଲେ: ଏହା ଦୁର୍ଭାବନାପୂର୍ଣ୍ଣ
ଜଷ୍ଟିସ୍ ଜାମଦାର ସ୍ପଷ୍ଟ କହିଲେ, “ନାଗରିକ ଏପରି ନାରା କାହିଁକି ଦେଇପାରିବେ ନାହିଁ? କେବଳ ସରକାର ବିରୋଧୀ ନାରା ପାଇଁ ଜିଲ୍ଲା ବଦର? ପୁଲିସ ମୁଖ୍ୟମନ୍ତ୍ରୀ କି ପ୍ରଧାନମନ୍ତ୍ରୀଙ୍କ ଚାକର ନୁହେଁ, ସେମାନେ ଜନସେବକ। ଯଦି ଲୋକେ ବିରୋଧ କରିବେ ତେବେ ଆପଣ କେସ୍ ଲଦିଦେବେ? ନାଗରିକଙ୍କ ପ୍ରତିବାଦ କରିବା ଅଧିକାର ଅଛି।”
ସେ ଆହୁରି କହିଲେ, “ନାଗରିକଙ୍କୁ ଭାରତ ସରକାରର କ୍ରୀତଦାସ ବନାଯାଉଛି। ସେମାନେ ପ୍ରଦର୍ଶନ କରିପାରିବେ ନାହିଁ, ଆନ୍ଦୋଳନ କରିପାରିବେ ନାହିଁ – ଏହା କ’ଣ?”
କାହିଁକି ଏହି ରାୟ ଐତିହାସିକ?
ଆଜି ଯେତେବେଳେ ଅସହମତିକୁ ‘ଦେଶଦ୍ରୋହ’ କୁହାଯାଉଛି, ବିରୋଧ ପ୍ରଦର୍ଶନ ଉପରେ UAPA ଲଗାଯାଉଛି, “ସରକାର ମୁର୍ଦ୍ଦାବାଦ” କହିଲେ ଜିଲ୍ଲା ବଦର କରାଯାଉଛି, ସେତେବେଳେ ଗୋଟିଏ ଅଦାଲତ ଛିଡ଼ା ହୋଇ କହିଲା – ନା, ନାଗରିକ କ୍ରୀତଦାସ ନୁହନ୍ତି।
ଏହି ରାୟ ସ୍ପଷ୍ଟ କରିଦେଲା ଯେ ସରକାରର ନିଷ୍ପତ୍ତିକୁ ବିରୋଧ କରିବା ଏବଂ ତା’ ବିରୁଦ୍ଧରେ ନାରା ଦେବା ସମ୍ବିଧାନର ଧାରା ୧୯ ଓ ୨୧ ଅନୁଯାୟୀ ମୌଳିକ ଅଧିକାର। ଏହା ଉଲ୍ଲଂଘନ କରି କାହାକୁ ଜିଲ୍ଲା ବଦର କରିବା ଦୁର୍ଭାବନାପୂର୍ଣ୍ଣ।
ପୁଲିସ କାହାର?
ଜଷ୍ଟିସ୍ ଜାମଦାରଙ୍କ ପ୍ରଶ୍ନ ସବୁଠାରୁ ଗୁରୁତ୍ୱପୂର୍ଣ: “ପୁଲିସ ମୁଖ୍ୟମନ୍ତ୍ରୀ କି ପ୍ରଧାନମନ୍ତ୍ରୀଙ୍କ ସେବକ ନୁହେଁ, ସେମାନେ ଜନସେବକ।” ଯେତେବେଳେ ଥାନା ଶାସକ ଦଳର ଦପ୍ତର ପାଲଟିଯାଏ, ଯେତେବେଳେ FIR ବିରୋଧୀଙ୍କ ମୁହଁ ବନ୍ଦ କରିବାର ଅସ୍ତ୍ର ହୋଇଯାଏ, ସେତେବେଳେ ଅଦାଲତର ଏହି ମନ୍ତବ୍ୟ ଗଣତନ୍ତ୍ର ପାଇଁ ଅମ୍ଳଜାନ ସଦୃଶ।
‘ୱାଶିଂ ମେସିନ୍’ର ଇଙ୍ଗିତ
ମହାରାଷ୍ଟ୍ରରେ ଚାଲିଥିବା ରାଜନୈତିକ ଘୋଡ଼ା-ବେପାର ଉପରେ ମଧ୍ୟ ଜଜ୍ ଟିପ୍ପଣୀ ଦେଲେ। ସେ କହିଲେ, ଏକ ୧୦ ବର୍ଷର ପିଲାର ଦୁର୍ଘଟଣାରେ ମୃତ୍ୟୁ ହେଲା, କିନ୍ତୁ ବିଧାନସଭାରେ ଆଲୋଚନା ହେଉଥିଲା କିପରି ଅଧ୍ୟକ୍ଷ ଚୟନ କରାଯିବ ଓ ସେ କିପରି ଗୋଟିଏ ଦଳରୁ ଅନ୍ୟ ଦଳକୁ ଯିବ। “ପୂରା ମହାରାଷ୍ଟ୍ରରେ horse-trading ଚାଲିଛି – କେସ୍ ବଦଳିଲେ ବିଚାର କର, ୱାଶିଂ ମେସିନ୍ ଅଛି।” ଏହି ବାକ୍ୟ କେବଳ ବ୍ୟଙ୍ଗ ନୁହେଁ, ଏହା ଆଜିର ରାଜନୀତିର ନଗ୍ନ ଚିତ୍ର।
ଶେଷକଥା
ଗଣତନ୍ତ୍ର କେବଳ ଭୋଟ୍ ଦେବାର ବ୍ୟବସ୍ଥା ନୁହେଁ। ଗଣତନ୍ତ୍ର ହେଉଛି ପ୍ରଶ୍ନ କରିବାର, ବିରୋଧ କରିବାର, ସରକାରକୁ “ମୁର୍ଦାବାଦ” କହିବାର ଅଧିକାର। ଯେଉଁଦିନ ଏହି ଅଧିକାର ଛଡ଼ାଇ ନିଆଯିବ, ସେଦିନ ଆମେ ନାଗରିକ ନୁହେଁ, କ୍ରୀତଦାସ ହୋଇଯିବା।
ବମ୍ବେ ହାଇକୋର୍ଟର ଏହି ରାୟ ଗୋଟିଏ ନଜିର। ଏହାକୁ ମନେରଖନ୍ତୁ, ସେୟାର କରନ୍ତୁ। କାରଣ ଯେତେବେଳେ ଅଦାଲତ ଜାଗେ, ଗଣତନ୍ତ୍ର ନିଶ୍ୱାସ ନିଏ।
ଆଉ ଯେତେବେଳେ ଅଦାଲତ କହେ “ନାଗରିକ କ୍ରୀତଦାସ ନୁହନ୍ତି”, ସେତେବେଳେ ବୁଝିବାକୁ ହେବ ଯେ ସମ୍ବିଧାନ ଏବେବି ଜୀବିତ।
*Shri Purnachandra Biswal is not just an editor; he is a dedicated social activist.*
As a propagator of Neo-humanism, he has been spreading the message of human values, equality, and justice in society.
As a nature lover, he is working to promote water conservation and environmental awareness in rural areas through environmental conservation and water conservation projects.
He has always raised his voice for the justice and protection of Dalits, the landless, and the helpless people.
As the editor of the monthly magazine *‘Nabasetu’*, he brings together literature, culture, and social awareness and delivers it to the readers.