ନବସେତୁ ନ୍ୟୁଜ୍ ପାଇଁ ଖବର – ବଲାଙ୍ଗିର
ବଲାଙ୍ଗିର, ୧୫/୧୦/୨୦୨୬ : ପଶ୍ଚିମ ଓଡ଼ିଶାର ପ୍ରମୁଖ ଶିକ୍ଷାନୁଷ୍ଠାନ ରାଜେନ୍ଦ୍ର ବିଶ୍ୱବିଦ୍ୟାଳୟରେ ଏବର୍ଷର ଛାତ୍ର ସଂସଦ ନିର୍ବାଚନ ବାତିଲ କରାଯାଇଛି। ବିଶ୍ୱବିଦ୍ୟାଳୟ ପ୍ରଶାସନ ପକ୍ଷରୁ ଗତକାଲି ଅଫିସ ଅର୍ଡର ନଂ ୨୪୭୦/RUB ଜାରି କରାଯାଇଛି।
ରେଜିଷ୍ଟ୍ରାରଙ୍କ ଦ୍ୱାରା ଜାରି ନିର୍ଦ୍ଦେଶରେ ଦର୍ଶାଯାଇଛି ଯେ, ବିଭିନ୍ନ ଗଣମାଧ୍ୟମରେ ପ୍ରକାଶିତ ରିପୋର୍ଟ ଏବଂ ଜିଲ୍ଲା ପ୍ରଶାସନର ଇନପୁଟ୍ ଆଧାରରେ ଦେଖାଦେଇଥିବା ଆଇନ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି କୁଳପତିଙ୍କ ଅଧ୍ୟକ୍ଷତାରେ ଅନୁଷ୍ଠିତ ଜରୁରୀ ବୈଠକରେ ଏହି ନିଷ୍ପତ୍ତି ନିଆଯାଇଛି। ଘୋଷିତ ତାରିଖରେ ନିର୍ବାଚନ ହେବ ନାହିଁ।
ମେମୋ ନଂ ୨୪୭୧ ଅନୁଯାୟୀ ଏହି ସୂଚନା ଜିଲ୍ଲାପାଳ, ବଲାଙ୍ଗିର ଏବଂ ଉଚ୍ଚ ଶିକ୍ଷା ବିଭାଗକୁ ପଠାଯାଇଛି।
ପ୍ରତିକ୍ରିୟା :
ନିର୍ବାଚନ ବାତିଲ ଖବର ପରେ ବିଶ୍ୱବିଦ୍ୟାଳୟ କ୍ୟାମ୍ପସରେ ମିଶ୍ର ପ୍ରତିକ୍ରିୟା ଦେଖିବାକୁ ମିଳିଛି। ସାଧାରଣ ଛାତ୍ରଛାତ୍ରୀଙ୍କ କହିବା ଅନୁଯାୟୀ, କିଛି ଅସାମାଜିକ ବ୍ୟକ୍ତିଙ୍କ ପାଇଁ ସମସ୍ତ ଛାତ୍ରଙ୍କ ଗଣତାନ୍ତ୍ରିକ ଅଧିକାର ଛଡାଇ ନେବା ଠିକ୍ ନୁହେଁ। ବିଶ୍ୱବିଦ୍ୟାଳୟ ପ୍ରଶାସନ ଶାନ୍ତିପୂର୍ଣ୍ଣ ନିର୍ବାଚନ ପାଇଁ ବ୍ୟବସ୍ଥା କରିବା ବଦଳରେ ସହଜ ରାସ୍ତା ଆପଣାଇଛି।
ଅନ୍ୟପକ୍ଷରେ ପ୍ରଶାସନ ପକ୍ଷରୁ କୁହାଯାଉଛି ଯେ, ଛାତ୍ରଙ୍କ ସୁରକ୍ଷା ଏବଂ କ୍ୟାମ୍ପସରେ ଶାନ୍ତି ବଜାୟ ରଖିବା ହିଁ ପ୍ରଥମ ପ୍ରାଥମିକତା।
ଆଗକୁ କ’ଣ?
ଏବେ ପ୍ରଶ୍ନ ଉଠୁଛି, ଏହି ନିର୍ବାଚନ ସମ୍ପୂର୍ଣ୍ଣ ବାତିଲ ହେଲା ନା ସ୍ଥଗିତ ରହିଲା? ବିଶ୍ୱବିଦ୍ୟାଳୟ ପକ୍ଷରୁ ଏ ନେଇ ସ୍ପଷ୍ଟ ସୂଚନା ଦିଆଯାଇ ନାହିଁ। ଛାତ୍ର ନେତାମାନେ ଶୀଘ୍ର ନିର୍ବାଚନ ତାରିଖ ଘୋଷଣା କରିବାକୁ ଦାବି କରିଛନ୍ତି।
– ନବସେତୁ ନ୍ୟୁଜ୍ , ବଲାଙ୍ଗିର